Ledige stillingar i matematikk

Høgskulen i Sogn og Fjordane har ledig ei fast 100 % -stilling og ei til to mellombelse stillingar som førsteamanuensis/ førstelektor i lærarutdanningane frå 01.08.2016. Stillingane er knytte til Avdeling for lærarutdanning og idrett i Sogndal.

Avdelinga har vel 900 studentar, 90 fagstillingar og 8 administrative stillingar.

Vi tilbyr fireårige grunnskulelærarutdanningar, treårig barnehagelærarutdanning, bachelorutdanningar i idrett, praktisk-pedagogisk utdanning og ei rad vidareutdanningsstudium. Avdelinga tilbyr også fire masterutdanningar, master i spesialpedagogikk, organisasjon og leiing, master i undervisning og læring, og master i idrettsvitskap. Matematikk er obligatorisk fag eller valfag i lærarutdanningane. I dag er det 10 tilsette i matematikkseksjonen. Vi ønskjer at seksjonen skal representere eit mangfald innanfor den matematikkfaglege disiplinen og nærliggande fagområde.

Satsingsområda våre på forsking og utviklingsarbeid er læringsforsking og idrettsforsking. Vi har klare ambisjonar om vidareutvikling og vekst knytt til oppdragsverksemd og satsar mykje på oppbygging til doktorgrad og førstelektor.

Arbeids og ansvarsområde
Arbeidsoppgåvene for stillinga er knytte til undervisningsoppgåver i matematikk ved grunnskule- og barnehagelærarutdanninga, mastergradstudiet og vidareutdanningar. Fagmiljøet er tungt involvert i nettbaserte vidareutdanningar for lærarar, og delar av stillinga vert innretta mot denne aktiviteten.

Kvalifikasjonar
Det vert kravd høgare utdanning frå universitet eller høgskule med doktorgrad eller tilgrensande fagområde i matematikk. Søkjar bør ha undervisningserfaring. Utdanning og kunnskap innan ikt og relevant undervisningsrøynsle frå høgare utdanning og då spesielt lærarutdanning, norsk skule eller barnehage, samt erfaring med nettbasert undervisning, vert tungt vektlagt. Det er ønskjeleg med forskingserfaring og eit breitt fagleg engasjement.

Den tilsette må kunne rettleie studentar i skriftlege arbeid, munnleg, og på nettet, og må rekne med ansvar for koordinering av studentgrupper.

Forsking og utviklingsarbeid på problemstillingar med relevans til faget ligg også til stillinga. Søkjaren bør skissera aktuelle forskingstema i søknaden. Stillinga krev gode samarbeidsevner og evne til å samarbeide med andre fag og eksterne partar. Det blir lagt stor vekt på personlege eigenskapar som fleksibilitet, evne til å ta initiativ, og engasjement. Undervisingsspråket er norsk og det er krav om gode norskkunnskapar .

For tilsetjing som førsteamanuensis er krava norsk doktorgrad eller vitskapleg kompetanse på tilsvarande nivå. For tilsetjing som førstelektor er kvalifikasjonar som NOKUT sine krav. Dersom det ikkje melder seg kvalifiserte søkjarar, kan høgskulen tilsetje som høgskulelektor, då er kravet hovudfag/mastergrad frå universitet/høgskule

For stillinga er kravet relevant yrkeserfaring samt dokumentert relevant praktisk-pedagogisk kompetanse på grunnlag av utdanning eller undervisning og rettleiing.

Tilsetjingsvilkår
Stillinga er lønna etter Statens lønsregulativ som førsteamanuensis/ førstelektor/høgskulelektor etter kvalifikasjonar og etter avtale. Høgskulen har tenestepensjon og frå brutto løn vert trekt lovfesta innskot til Statens pensjonskasse.

Den statlege arbeidsstyrken skal i størst mogleg grad spegle mangfaldet i folket. Det er difor eit personalpolitisk mål å oppnå ei balansert alders- og kjønnssamansetjing og rekruttere personar med innvandrarbakgrunn. Personar med innvandrarbakgrunn vert oppmoda om å søkje stillinga. Høgskulen i Sogn og Fjordane er ei IA-bedrift. Arbeidsspråket er norsk.

Tilsetjing skjer på dei vilkår som følgjer av Lov om statens tenestemenn og dei reglement som til ei kvar tid gjeld i høgskulen.

Søknad med CV, attestar og vitnemål skal sendast elektronisk. Søknaden skal gje eit fullstendig oversyn over utdanning og tidlegare praksis og ha ei liste over vitskaplege arbeid.

Elektronisk søknad med vedlagde attestar og vitnemål kan bli sendt vidare til ein sakkunnig kommisjon for vurdering. Det er difor viktig at all dokumentasjon kjem med i søknaden. Sentrale vitskaplege arbeid som bør med i vurderinga skal også lastast opp som vedlegg til søknaden.