Ledig embete som fylkesmann i Hordaland og Sogn og Fjordane (åremål)

Fylkesmannsembeta i Hordaland og Sogn og Fjordane blir slått saman frå 1. januar 2019, og vil ha delt lokalisering. Samstundes blir det oppretta eit embete som fylkesmann for det nye embetet. Fylkesmannen vil leie ei forvaltningseining med omfattande oppgåver med om lag 330 tilsette. Kontorstad for fylkesmannen vil bli beslutta seinare.

Den som søkjer må ha omfattande og god samfunnsinnsikt og samfunnsengasjement, samt røynsle frå og innsikt i offentleg forvaltning. Det må dokumenterast røynsle som leiar på høgt nivå frå offentleg og/eller privat verksemd eller frå organisasjonsarbeid. Evne og vilje til problemanalyse og til å nå resultat, nyorientering og utvikling vert vektlagt, saman med dokumenterte resultat frå omstillings- og integreringsprosessar. Det er ønskeleg med høgare utdanning.

Ei viktig oppgåve for fylkesmannen er samordning av statlege sektoroppgåver i høve til kommunane og fylkeskommunane. Det vert difor lagt vekt på evne til samarbeid , konflikthandtering og god sosial fungering. Vidare bør søkjarar ha gode evner til intern motivering og ekstern profilering av oppgåvene og organisasjonen.

Embetet som fylkesmann i Hordaland og Sogn og Fjordane (kan bli navnendring) vert etablert 1. januar 2019, med tilsetjing frå dette tidspunktet. Lengda på åremålet er seks år, med høve til gjenoppnemning i ein ny seksårsperiode etter offentleg kunngjering og konkurranse.

Embetet vert lønna i leiarlønnssystemet i staten. Innskot til Statens pensjonskasse vert trekt frå i samsvar med gjeldande vedtak. Ut frå prinsippet om open sakshandsaming når det gjeld stillingar av særleg stor offentleg interesse, vil namna på alle søkjarane verte ført opp på ei offentleg søkjarliste, som det offentlege har innsynsrett i.

Vi legg vekt på mangfald og oppfordrar difor alle kvalifiserte til å søkje - uansett alder, kjønn, funksjonsevne, etnisk bakgrunn eller seksuell legning. Arbeidstilhøva vil bli lagt til rette for medarbeidarar med redusert funksjonsevne, til dømes med redusert stilling der det er mogleg. Søkjarar som informerer om at dei har redusert funksjonsevne, vil bli invitert til intervju dersom dei er kvalifiserte.

For nærare opplysingar om embetet, ta kontakt med departementsråd Eivind Dale, tlf. 22 24 68 08, eller ekspedisjonssjef Cathrin Sætre, tlf. 22 24 42 85.

Søknadsfristen er 6. april 2017.